15 feb. 2018

Craig Pedersen, þjálfari íslenska landsliðsins í körfuknattleik, og aðstoðarþjálfarar hans, Arnar Guðjónsson og Finnur Freyr Stefánsson, hafa boðað leikmenn til æfinga fyrir landsleikina sem framundan eru í undankeppni HM karla 2019. 

Formlegar landsliðsæfingar hefjast eftir helgina en áður en að þeim kemur hafa verið boðaðir til æfinga á laugardag og sunnudag 20 leikmenn sem eiga kost á að verða boðaðir til áframhaldandi æfinga í loka æfingahópnum. Í hópnum sem mætir fyrr til æfinga eru bæði leikmenn sem hafa verið í eða í kringum landsliðsæfingahópinn að undanförnu, ungir og efnilegir leikmenn og leikmenn sem hafa verið að stíga sín fyrstu spor með A-landsliðinu undanfarið.

Hópurinn æfir saman eins og áður segir um helgina og verða þá í kjölfarið nokkrir leikmenn boðaðir til áframhaldandi æfinga í lokaæfingahóp fyrir landsleikina tvo sem framundan eru, dagana 23. febrúar og 25. febrúar gegn Finnlandi og Tékklandi, hér heima í Laugardalshöllinni. 

Um er að ræða gríðarlega mikilvæga leiki fyrir Ísland þar sem nauðsynlegt er að ná góðum úrslitum upp á framhald undankeppninnar, en liðið lék gegn Tékkum og Búlgaríu í nóvemberglugganum, þar sem báðir leikir töpuðust. 

Það verður því krefjandi verkefni sem bíður þeirra 12 leikmanna sem valdir verða í landsliðið að þessu sinni í næstu viku.

Miðasala er hafin á leikina á www.tix.is en KKÍ hvetur körfuknattleiksaðdáendur landsins til að fjölmenna og styðja við bakið á liðinu, en það hefur sýnt sig að góður stuðningur hefur skipt sköpum á undanförnum árum í okkar heimaleikjum.

Þeir leikmenn sem boðaðir hafa verið í stóra æfingahópinn um helgina eru:
Axel Kárason Tindastóll
Breki Gylfason Haukar
Dagur Kár Jónsson Grindavík
Emil Barja Haukar
Emil Karel Einarsson Þór Þorlákshöfn
Halldór Garðar Hermannsson Þór Þorlákshöfn
Hjálmar Stefánsson Haukar
Illugi Steingrímsson Valur
Ingvi Rafn Ingvarsson Þór Akureyri
Kári Jónsson Haukar
Kristinn Pálsson Njarðvík
Kristján Leifur Sverrisson Haukar
Maciek Baginski Njarðvík
Matthías Orri Sigurðarson ÍR
Ólafur Ólafsson Grindavík
Pétur Rúnar Birgisson Tindastóll
Ragnar Ágúst Nathanaelsson Njarðvík
Sigtryggur Arnar Björnsson Tindastóll
Tómas Þórður Hilmarsson Stjarnan
Viðar Ágústsson Tindastóll

Þeir leikmenn sem boðaðir hafa verið til æfinga eftir helgina í lokaæfingahópinn eru:

Haukur Helgi Pálsson Briem Cholet Basket, Frakkaland
Hlynur Bæringsson Stjarnan
Hörður Axel Vilhjálmsson Keflavík
Jakob Örn Sigurðarsson Borås Basket, Svíþjóð
Jón Arnór Stefánsson KR
Kristófer Acox KR
Logi Gunnarsson Njarðvík
Martin Hermannsson Châlons-Reims, Frakkland
Pavel Ermolinskij KR
Tryggvi Snær Hlinason Valencia, Spánn

Tveir leikmenn gáfu ekki kost á sér að þessu sinni en það voru þeir Brynjar Þór Björnsson, KR, og Ægir Þór Steinarsson, Tau Castello, Spáni.

#korfubolti