Reglugerð um menntun körfuknattleiksþjálfara

1.Almenn ákvæði
Allir þjálfarar skulu hafa fullnægjandi og viðeigandi menntun til þeirra þjálfarastarfa sem þeir vinna. Með hugtakinu þjálfari er hér átt við hvern þann sem kennir körfubolta og skipuleggur og stjórnar körfuboltaæfingum og körfuboltaleikjum. 

Félög sem uppfylla ekki þær kröfur um menntun sem settar eru fram í reglugerð þessari greiða 50.000.króna sekt fyrir flokka sem tilheyra Þjálfara 1, 100.000 króna sekt fyrir flokka sem tilheyra Þjálfara 2, 250.000 króna sekt fyrir flokka sem tilheyra Þjálfara 3.  KKÍ gjaldfærir þessa viðbót á þátttökugjöldum 1. maí ár hvert. Félög sleppa þá einungis við að greiða sekt.  Hafi það uppfyllt neðangreindar kröfur allt keppnistímabilið á undan.  Félag sem verður uppvíst að því að hafa rangt við eða veita vísvitandi rangar upplýsingar hefur fyrirgert möguleikum sínum á því að sleppa við sekt og undanþágu á meðan þjálfari er í námi.

 

 

2. Menntunarkröfur

Menntunarkröfur þjálfara felur í sér að þjálfarar þurfa að vera með tiltekna menntun til að fá að þjálfa tiltekna aldurshóp hjá aðildarfélögum KKÍ.

KKÍ 1 er klárað þegar þjálfari hefur klárað eftirfarandi námskeið: KKÍ 1 A, 1 B OG 1 C

KKÍ 2 er klárað þegar þjálfari hefur klárað eftirfarandi námskeið: KKÍ 2 A, 2 B OG 2 C

KKÍ 3 er klárað þegar þjálfari hefur klárað eftirfarandi námskeið: KKÍ 3 A, 3 B OG 3 C

Þjálfari 1 er klárað þegar þjálfari hefur klárað KKÍ 1 og ÍSÍ 1

Þjálfari 2 er klárað þegar þjálfari hefur klárað KKÍ 2 og ÍSÍ 2

Þjálfari 3 er klárað þegar þjálfari hefur klárað KKÍ 3 og ÍSÍ 3

 

Þjálfari 1 – þarf að hafa klárað KKÍ 1 og ÍSÍ 1
Gefur leyfi til að þjálfa Minnibolti 11 ára og yngri og að starfa sem aðstoðarþjálfari í öllum yngri flokkum.

Þjálfari 2
Gefur leyfi til að þjálfa frá 7. flokki til og með unglingaflokks. Aðstoðarþjálfari í meistaraflokk í tveimur efstu deildum karla og kvenna, þjálfari í öðrum deildum en tveimur efstu deildum karla og kvenna og aðstoðarþjálfari yngri landsliða KKÍ.

Þjálfari 3 
Gefur leyfi til að þjálfa meistaraflokk í tveimur efstu deildum karla og kvenna, að vera yfirþjálfari yngri flokka í félagsliði og þjálfa landslið KKÍ. Þjálfari 3 hefur einnig leyfi til að verða leiðbeinandi í þjálfaranámi KKÍ.

 

3. Endurmenntun

Þjálfari sem lokið hefur Þjálfari 3 þjálfaragráðu frá KKÍ og ÍSÍ þarf að sækja sér endurmenntun reglulega eða hið minnsta á þriggja ára fresti til að viðhalda réttindunum sínum.  Ásamt því þarf hann að skila inn staðfestingu til fræðslunefndar KKÍ og að sækja fund dómaranefndar með þjálfurum á hverju hausti. 

 

Fræðslunefnd KKÍ ákvarðar hvað telst gild endurmenntun til endurnýjunar á þjálfararéttindunum.

 

4. Mat réttinda

Fræðslunefnd KKÍ metur hvaða réttindi nám/námskeið á Íslandi og erlendis veita og hvaða réttindi útlendingar hafa til þjálfunar á Íslandi.

 

5. Undanþágur

Fræðslunefnd KKÍ er heimilt að veita undanþágu frá ákvæðum í reglugerð þessari ef veigamiklar og sérstakar ástæður liggja að baki. Slíkar undanþágur skal þó alltaf bera undir stjórn KKÍ til samþykktar.

 

6. Gildistaka

Reglugerð þessi tekur gildi 1. júní 2011 með breytingum vorið 2019.

Þessi síða notar vafrakökur Lesa meira