21 feb. 2001Úrslitaleikir bikarkeppni KKÍ & DORITOS fara fram í Laugardalshöll laugardaginn 24. febrúar 2001. Til úrslita í kvennaflokki leika KR og Keflavík, leikur liðanna hefst kl.14:00. Í karlaflokki leika ÍR og Hamar til úrslita og hefst leikurinn kl.16:00. Kvennaleikurinn er sá 27. í röðinni, en fyrst var keppt í bikarkeppni kvenna árið 1975. Nokkru fyrr var keppt í bikarkeppni karla, eða árið 1970. Til var bikarkeppni fyrir þann tíma, en þá var eingöngu keppt í 1. flokki og telst sú keppni ekki með hinni eiginlegu bikarkeppni. Bikarúrslitaleikur ÍR og Hamars er því sá 32. í röðinni. Konur: Keflavík og KR eru mikil bikarlið og ásamt ÍS hafa þessi lið oftast leikið til úrslita í keppninni eða 12 sinnum hvert félag. KR og Keflavík leika nú í 13. sinn til úrslita í bikarkeppni. Þetrta er í 6. sinn sem Keflavík og KR mætast í úrslitaleik bikarkeppninnar, áður hafa félögin mæst 1987, 1993, 1995 og 1997. KR sigraði fyrsta árið, en síðan hefur Keflavík þrívegis haft betur. Keflavík hefur oftast allra félaga orðið bikarmeistari 10 sinnum og KR 7 sinnum. Karlar: Ljóst er að nýtt félag bætast í hóp þeirra félaga sem sigrað hafa í bikarkeppni KKÍ, því hvorki ÍR né Hamar hafa nokkru sinni sigrað í keppninni. ÍR hefur nokkrum sinnum komist í úrslit bikarkeppninnar eða 5 sinnum, 1971, 1972, 1979, 1983 og 1989. Leikurinn gegn Hamri er því 6. bikarúrslitaleikur félagsins. ÍR hefur tapað í öll þau skipti sem liðið hefur leikið til úrslita í keppninni. Hamar mun á laugardaginn leika til úrslita í bikarkeppninni í fyrsta sinn. Hamar lék í fyrsta sinn í efstu deild í fyrra og komst þá í úrslitakeppnina með því að ná 8. sætinu með sigri í síðustu umferð deildarkeppninnar. Í dag er Hamar í 6. sæti deildarinnar. mt: Þjálfarar liðanna sem mætast í bikarúrslitunum í karlaflokki eru frændurnir Jón Örn Guðmundsson ÍR og Pétur Ingvarsson Hamri.