Frétt

Kristinn Óskarsson, National Referee Instructor (NRI), sótti nýverið ANIC 2026 (Annual National Instructors Clinic) sem fram fór í Samokov í Búlgaríu dagana 29. maí – 1. júní.

ANIC er árlegt námskeið FIBA Europe fyrir þá sem bera ábyrgð á menntun, leiðsögn og þróun dómara í aðildarlöndum sambandsins. Á námskeiðinu koma saman fulltrúar frá fjölmörgum Evrópulöndum til að skiptast á reynslu, kynna sér nýjar áherslur FIBA og ræða leiðir til að efla dómgæslu og dómaramenntun til framtíðar.

Dagskráin samanstóð af fyrirlestrum, vinnustofum, hópavinnu og umræðum þar sem þátttakendur fengu tækifæri til að bera saman reynslu og nálganir frá ólíkum löndum og jafnframt ólíkri körfuboltamenningu. Mikil áhersla var lögð á samvinnu, miðlun þekkingar og hvernig best sé að styðja við þróun dómara á öllum stigum.

Námskeiðið var jafnframt mikilvægt tækifæri til að styrkja tengslanet þeirra sem starfa að dómaramálum innan FIBA Europe og fá innsýn í þau verkefni og áskoranir sem þjóðarsambönd víðs vegar um Evrópu standa frammi fyrir.

Þátttaka í námskeiðum sem þessum er mikilvægur þáttur í áframhaldandi þróun íslenskrar dómgæslu og tryggir að þeir sem sinna menntun og leiðsögn dómara hér á landi hafi aðgang að nýjustu hugmyndum, áherslum og starfsvenjum innan alþjóðlegs körfubolta.

KKÍ þakkar FIBA Europe fyrir vel heppnað námskeið og það tækifæri sem íslenskum fulltrúum gefst til að taka þátt í alþjóðlegu samstarfi á þessu sviði.